Кураштан Қазақстан атынан сынға түсетін Әбілқайыр Мауленин антидопинг ережелерін бұзғаны үшін төрт жылға спорттан шеттетілді. Бұл туралы Халықаралық тестілеу агенттігі (ITA) хабарлады, деп жазады Sportbugin.kz.
Спортшының 2024 жылғы 17 желтоқсанда Өзбекстан астанасы Ташкентте өткен World Series Pro турнирінің финалында тапсырған допинг-сынамасынан экзогендік тестостерон мен андростеронға қатысты қолайсыз аналитикалық нәтиже анықталған.
Аталған заттар Дүниежүзілік допингке қарсы агенттіктің (WADA) тыйым салынған заттар тізіміне анаболикалық-андрогендік стероидтар санатында енгізілген. Олар жарыс кезінде де, жарыстан тыс уақытта да қолдануға тыйым салынған заттар қатарына жатады.
Халықаралық тестілеу агенттігі санкцияны Халықаралық Кураш қауымдастығының (IKA) атынан шығарған. Маулениннің спорттан шеттетілу мерзімі 2025 жылғы 27 мамырдан 2029 жылғы 26 мамырға дейін жалғасады. Сонымен қатар спортшының 2024 жылғы 17 желтоқсаннан бергі нәтижелері жарамсыз деп танылды.
About the Author
