Моңғолия астанасы Ұлан-Батырда күрестен өтіп жатқан Ulaanbaatar Open рейтингтік турнирінің екінші жарыс күнінде отандық балуандар бірнеше жүлдеге қол жеткізді, деп жазады Sportbugin.kz.
Грек-рим күресінен 63 келі салмақта Еркебұлан Ардақов жартылай финалда қырғызстандық Жоламан Шаршенбековке 1:3 есебімен есе жіберді. Ал қола медаль үшін кездесуде Оңтүстік Корея өкілін 7:4 есебімен ұтып, жүлдегерлер қатарына қосылды.
130 келі салмқта Олжас Сырлыбай жартылай финалда моңғолиялық Батбаяр Намбардагваға 1:2 есебімен есе жіберді. Қола жүлде үшін белдесуде үндістандық қарсыласын айқын басымдықпен ұтып, турнирдің қола жүлдегері атанды.
Ал әйелдер күресінен 50 келідегі Марал Тәңірбергенова алғашқы айналымда қытайлық Анки Баодан 0:10 есебімен жеңілді. Жұбаныш белдесуінде жергілікті спортшыны 10:0 есебімен ұтқанымен, қола медаль үшін кездесуде үндістандық қарсыласына жол берді.
57 келі салмақта Нилуфар Раимова жартылай финалдық кезеңнен аса алмағанымен, қола жүлде үшін белдесуде Сингапур өкілін айқын басымдықпен жеңіп, турнирдің қола медалін иеленді.
Ал 72 келідегі Жәмилә Бақбергенова жартылай финалда моңғолиялық Болортунгалаг Зоригттен 2:6 есебімен ұтылды. Кейін жарақатына байланысты қола медаль үшін белдесуге шықпай, жарысты мерзімінен бұрын аяқтады.
About the Author
