Күрес түрлерінен Стамбулда өтетін соңғы іріктеу турниріне тағы да Нұрғожа Қайпанов қатысады, деп жазады Sportbugin.kz.
Еркін күрестен 74 келі салмақта өзгеріс орын алды. Ең соңғы лицензиялық жарысқа баруы тиіс Талғат Сырбаз жарақат алып қалды. Сол себепті, оның орнына Нұрғожа Қайпанов аттанады.
Бас бапкер Мадияр Құрамысовтың айтуынша, Талғат беліндегі жарақатына байланысты жарысқа барудан бас тартқан.
Айта кетелік, Нұрғожа Қайпанов Бішкекте (Қырғызстан) өткен іріктеу турнирінде ойсырай ұтылған болатын. Сондай-ақ, Сербияда өткен лицензиялық әлем чемпионатында да нәтиже көрсеткен жоқ.
Стамбулдағы іріктеу турнирі 9-12 мамыр аралығында өтеді.