Отандық WT таеквондо федерациясының президенті Құдырет Шәмиев Қазақстан таеквондодан 2027 жылғы әлем чемпионатын қабылдауға мүдделі екенін айтты. Бұл туралы ол ұлттық құраманың бірлескен жиынында мәлімдеді, деп жазады Sportbugin.kz.
«2014 жылдан бері Қазақстанда таеквондодан әлемдік жарыстар өтпеген. Бірінші кезекте, бұл біздің оқшауланып қалғанымызды білдіреді. Спорт бар жерде саясат та бар. Сол саясат шеңберінен тым алыста жүрмегеніміз дұрыс. Сондықтан, біз өз елімізде World Taekwondo аясында өткізілетін ірі жарыстарды қабылдауға толық дайынбыз.
Атап айтар болсақ, тамыз айында Kazakhstan Open турнирін жоғары дәреже өткізетін жоспарымыз бар. Бұл бәсекеге әлемдік таеквондодағы беделді тұлғалар мен чемпиондар шақырылады.
2026 жылы таеквондодан Гран-при турнирін, ал 2027 жылы таеквондодан әлем чемпионатын өткізуге үміткер атанбақпыз. Қазіргі таңда біз осы жарыстарға қатысты құжаттарды түгел дайындап, әлемдік ұйымға жібердік.
Елімізде таеквондоға деген қызығушылықтың жоғары екенін өзіміз көрсетпесек, әлемдік ұйымнан бізге деген көзқарасты сұрап алу қиын. Олармен байланыста болып, әртүрлі келіп жатқан өзгерістер, жаңашылдықтар, бағдарламалардан хабардар болуымыз керек», — деді Құдырет Шәмиев.
Айта кетелік, таеквондодан Қазақстан құрамасы бұл күндері Алматы облысында Қытайдың Синцзянь аймағынан келген оқу-жаттығу жиындарын аяқтауға дайын.
Есбол Сұлтановтың шәкірттері Болгарияда өтетін халықаралық турнирге дайындалуда.
Одан бөлек, 2024 жылдың күзінде Қазақстан таеквондо федерациясы төрешілерге арналған әлемдік семинарды жоғары деңгейде өткізген болатын.