Еркін күрестен әлем чемпионы Нұрқожа Қайпановтың жеке бапкері Сағындық Бейсембаев елімізде балуандардың денсаулығын қадағалайтын мамандар жоқтығын айтты, деп жазады Sportbugin.kz.
«Бізде нөмір бірінші спорт — бокс. Бәрі кәсіби түрде жаттығу үшін Америкаға барады. Ол жақта кәсіби боксшыға барлық жағдай жасалған. Әлемде бәрі дамып кеткен. Тіпті, ғылыми топтары бар.
Біз бәрін көзбен өлшейміз. Кейде жарысқа бара жатқанда кардиограммасын тексермеміз. Жақсы нәтиже берсе де, бермесе де, ол толыққанды тексерістен өтуі керек. Қатты қысым бар ма? Мүмкін оған дайындық керек емес болар? Не көбірек күш салу қажет шығар? Бір емес, екі рет жаттығуы жөн болар? Осының бәрін ойлаймыз. Арасында үш рет жаттыққан кездеріміз де болды. Оның ішкі жай-күйін білмейміз.
Өз балаңның ішкі күйін көзқарасынан сезесің ғой, ал өзің 15 жылдан бері жаттығып келе жатқан балаңды беске білесің.
Мысалы, лицензиялық турнирге, әлем чемпионатына бара жатқанда Нұрқожаны тексергенін байқамыдым. Қалыпты диспансерден өтетін тексеріс ғана бар. Оның өзінде де бәрін бір күнге үйіп тастайды. Әрқайсысының қасында біреу жүруі керек.
Мысалы, біз он баланың артында бір бапкер жүреміз. Америка, Жапония секілді көш бастап тұрған елдерді алсаңыз, әлем чемпионаты мен Азияда алмаса да, олимпиададан жоқ дегенде бір алтын алады. Осыдан-ақ Жапонияның қандай биікте тұрғанын байқауға болады. Кешегі жарыстың өзінде жап-жас балалар өздерін қалай көрсетіп жатыр?! 23 жасында жастар арасында күресіп, кейін ересектер арасында медаль алып жатыр.
Бізде қалай? Әлем чемпионатына күрескеннен кейін еске аламыз. Олар нақты жүйемен жұмыс істейді. Ал біздегі уақыт диспансерде кезекте тұрумен өтеді», — деді Сағындық Бейсембаев.