Елімізге белгілі спорт журналисі Ғалым Сүлеймен Қазақстан бокс федерациясының өз ұстанымына өзі қарсы шыққанын айтып, пікір білдірді. Бұл туралы Sportbugin.kz хабарлайды.
2024 жылы Қайрат Сәтжановты ұлттық құрамаға бас бапкер қылып тағайындағанда, Қазақстан бокс федерациясы бас бапкердің командада жеке шәкірті болмауы керектігіне баса назар аударған. Бұл — бас жаттықтырушыға қойылған негізгі талаптардың бірі болды.
Алайда, 2026 жылы тағайындалған Нұржан Насановтің командада төл шәкірті бар, ол — екі дүркін әлем чемпионы Санжар Тәшкенбай. Журналистің пікірінше, бұл тұжырым кезінде тек Сәтжановқа арнап шығарылған.
«Париж Олимпиадасынан кейін Қайрат Сәтжановты тағайындағанда, федерация бапкердің ұлттық құрамада жеке шәкірті болмауын қадағалады. Бұл дұрыс емес қой! Жеке шәкірті жоқ қандай бапкерді көрдіңіз? Меніңше, сол кезде өздеріне ыңғайлы болу үшін осындай тұжырым ойлап тапты. Тіпті, соны Сәтжановқа арнап шығарған болуы керек.
Қазір федерация өкілдері өз сөздеріне өздері қарсы шығып, Санжар Тәшкенбайдың жеке бапкерін бас командаға алып келді. Бұл кісіні танымаймын, сондықтан, оның әлеуетіне баға бере алмаймын. Бірақ федерацияның екіжақты ұстанымы, расында, ұят болды», — деді Ғалым Сүлеймен.
Айта кетелік, 10 қаңтар күні Қазақстан бокс федерациясы жаңа бас бапкерді таныстырды. Жаңа бапкердің есімі — Нұржан Насанов.
About the Author
