Боксшы әрі спорт сарапшысы Айдар Шәрібаев ұлттық құрама боксшыларының кәсіби боксқа ауысуға ұмтылуының басты себептерін атады, деп жазады Sportbugin.kz.
«Бір нәрсені мойындау керек, IBA Nomad-тың пиары он есе артық болып тұр. Ұлттық құрамадағы боксшылар не үшін сондай шоуларға қатысқысы келеді?
Біріншіден, олардың ақшалары аз. Ұлттық құрамадағы алатын айлықтары қарапайым бір жұмыстың жалақысындай ғана болып тұр. Бірақ олардың арқасында елдің туын көтеру деген үлкен жүк бар.
Одан бөлек, олар — жастар. Олар да елдің алдына шығып, танымал болғысы келеді. Бірақ Қазақстан бокс федерациясы оларға ондай мүмкіндік жасап беріп жатқан жоқ. Сондықтан спортшылар сондай мүмкіндіктерді өздері іздеп кетіп жатыр. Сол үшін осындай нәрсенің алдын алу керек. Тек дайындай беру жеткіліксіз, өздерін көрсететін алаң да керек.
Ұлттық құраманың бас бапкерінің шәкірті де, өзі де шықты. Енді басқалары да шыққысы келеді ғой. Оны тоқтата алмайсың», — деді Айдар Шәрібаев.
Айта кетейік, ұлттық құраманың бас бапкері Нұржан Насановтың жеке шәкірті Санжар Тәшкенбай 28 тамыз күні Астанада өткен IBA NOMAD турнирінде өнер көрсеткен болатын.
About the Author
