«Әл-Наср» клубының шабуылшысы Криштиану Роналду Еуропа чемпионатына қатысатын Португалия құрамасына шақырту алды, деп жазады Sportbugin.kz.
Әлемге әйгілі футболшы осымен алтыншы Еуропа чемпионатына қатыспақ. Ол 2004 жылдан бері Еурода өнер көрсетіп келеді. Ал 2016 жылы Португалия сапында Еуропа чемпионы атанды.
Осылайша, Роналду Еуропа чемпионатына ең көп қатысқан футболшы ретінде тарихта қалуы мүмкін. Бұған дейін Икер Касильяс құрлық додасында бес рет бақ сынаған еді.
Криштиану Роналду 39 жаста. Ол «Алтын доптың» бес дүркін иегері. Биылғы маусымда Сауд Арабиясы чемпионатында 29 матч өткізіп, 33 гол соққан.
Еуропа чемпионаты 14 маусым мен 14 шілде аралығында Германияда өтеді. Португалия құрамасы Чехия, Грузия және Түркиямен бірге F тобында ойнайды.