Еркін күрестен әлем чемпионы Ризабек Айтмұханның әкесі әрі жеке бапкері Қанат Жолдасбаев Амманда (Иордания) өткен Азия чемпионатын қорытындылады, деп жазады Sportbugin.kz.
Бапкердің айтуынша, Ризабек осымен үшінші рет құрлық додасының финалында сүрініп отыр.
«Жеке өзім бұл нәтижені жаман емес деп ойлаймын. Биылғы маусымдағы алғашқы ресми жарысы. Бұған дейін демалды, оңалтудан өтті. Біздегі басты мақсат – биылғы әлем чемпионатына дейін бабымызға ену. Байқауымша, жапондықтар сәуір айында бабына кіріп үлгереді екен. Ал Ризабектің ағзасы қыркүйек, қазан айларында дайын болады. Үш жылдан бері осы процесті бақылап жүрмін.
Қазір 97 келі салмақтың кіл мықтылары Азияда жиналған. Ирандық бар, жапон бар, Бахрейн атынан күресетін Тажудинов, біздің Ризабек… Еуропада Садуллаев пен бір-екі балуанды көреміз, ал Америкадан Снайдер шығады. Әлемнің мықтысы болу үшін Азияда да өзіңді дәлелдеу қажет.
Меніңше, биылғы финалда Араш Ешида да, Ризабек те ашылған жоқ. Егер бірден ашық айқасқа көшсе, бірін-бірі оқып қоятын еді. Келесі маусым тайталасқа толы болмақ. Азия ойындары, әрі қарай Олимпиада күтіп тұр. Сол кезге қарай Ризабек те бұл салмаққа орнығып, толысады деп ойлаймын. Нағыз қызық енді басталады», — деді Қанат мырза.
Айта кетелік, Ризабек Айтмұхан еркін күрестен қазақтан шыққан тұңғыш әлем чемпионы, жастар мен жасөспірімдер арасындағы әлем чемпионы және Азия чемпионатының үш дүркін күміс жүлдегері.