Алматыда күрес түрлерінен өткен Қазақстан кубогында еркін күрестен 65 келі салмақта Начын Куулар мен Шаттық Алайдар арасындағы жартылай финалдық белдесу көпшіліктің талқысына түсті. Осы жағдайға байланысты Олимпиадалық дәрежедегі UWW төрешісі Ерік Жұмабеков пікір білдірді, деп хабарлайды Sportbugin.kz.
«Алғашында есеп 4:1 болып, Начын алда келе жатқан сәтте Алайдар тарапы челлендж сұрады. Біз эпизодты толық қарап шықтық. Қауіпті әрекет болмағандықтан, Начынға берілген ұпайды алып, оны Алайдарға қостық. Осыдан кейін белдесу соңында Начын 2 ұпай айырмасымен жеңіліп жатты.
Начын Куулар өзіне 2 ұпай қажет екенін түсініп, қарсыласының қолынан ұстап, белінен тартып, отырғызар кезде Шаттық Алайдар бұрылып, кілемнен шығып кетеді. Егер Начын қарсыласын итеріп шығарып жібергенде, оған тек 1 ұпай берілер еді. Ал бұл жағдайда 2 ұпай берілді. Неге?Бір ұпай кілем шетіне шығып кеткені үшін, тағы бір ұпай ескерту нәтижесінде кілемнен қашқаны үшін Начынның еншісіне жазылды.
Бұл сәтте балуан да, бапкері де ережені толық түсінбей отыр. Оның үстіне, Начынның легионер болуы да артық эмоция тудырды.
Бұл кездесуге UWW тарапынан шақырылған тәуелсіз төрешілер қазылық етті. Ал кілем жетекшісі былтыр әлем чемпионатында «алтын ысқырық» иегері атанған халықаралық дәрежедегі танымал төреші Мариус Кимпоэру болды. Бұл белдесуде халықаралық деңгейдегі төрешілер жұмыс істеді. Сондықтан қабылданған шешім әділ болды.
Алайдар ережені толық білмегендіктен ұтылып қалды. Осындай жағдайлар әлемдік жарыстарда да кездеседі. Сондықтан балуан да, бапкер де ережені жетік меңгеруі керек. Әйтпесе, бұл өзімізге кері әсерін тигізіп, ұпайдан қағылып, жеңіліске әкелуі мүмкін», — деді Ерік Жұмабеков.
About the Author
