Дзюдодан Қазақстан құрамасының бұрынғы спортшысы, бүгінде бапкерлікке бет бұрған Елдос Жұмақанов Паралимпиада ойындарында жүлде алған шәкірті туралы айтты. Бұл туралы журналист Ақырыс Сейтқазының YouTube арнасына сілтеме жасаған Sportbugin.kz хабарлайды.
«Парадзюдодан Париждегі Паралимпиада ойындарының жүлдегерін дайындадым. Сол балам жайлы кеңірек айтқым келіп тұр. Жұрқамырза Шүкірбеков менің спорт залымда жаттығады. Залды ашқалы бері менде дайындалып жүрген. Көзінің көру қабілеті төмен екенін ескеріп, оны парадзюдоға ауыстырған едім. Солай парадзюдошылар қатарына қосылды.
Бірақ, Жұрқамырзаның жаттығуға келмей қалатын кездері көбейіп кетті. Кейін оның курьер болып жұмыс істеп жүргенін естідім. Мопедпен курьер боп жүргеніне бір жылдан асыпты. Өзі көзі онша көрмейтін жігіт қой. Оның үстіне, мопедпен қыстың суығында да жұмыс істеген. Суықта жұмыс істеуге болмайды спортшыға. Әрі денсаулығында ақау бар. Сонымен, оны шақырып алдым да, жігітше сөйлестім.
Егер жеңіске жететін болсақ, бапкер мен шәкірт арасында ешқандай құпия болмауы керектігін түсіндірдім. Мәселенің басын ашып алдық. Оған мопедті тастап, қайтадан залға келу керектігін түсіндірдім. Себебі, күресу келеді оны қолынан.
Әрине, оған қомақты қаражат төлей алмаймын. Миллионер емеспін, асып-тасып жатқаным жоқ. Бірақ жарысқа баратын жол-пұлын тауып беруге уәде еттім. Осылайша, жаттығуды қайта бастадық. Медициналық комиссиясынан өттік, бұл да үлкен шаруа. Үш-төрт жарысқа барарда достарым демеушілік танытты. Бұл кезде Париждегі Паралимпиада ойындарына азғантай уақыт қалған еді. Сол рейтингке еніп, қажетті ұпайын жинап, Паралимпиадада қола жүлдегер атанды.
Кейін ата-анасы да ризашылығын айтып жатыр. Олар өте қарапайым кісілер», — дейді Жұмақанов.