Қазақстан ММА федерациясының президенті Сағындық Мекеев елдегі аралас жекпе-жек спортының деңгейі төмендеп бара жатқанын айтты, деп хабарлайды Sports.kz сайтына сілтеме жасаған Sportbugin.kz.
Мекеевтің сөзінше, Игорь Свирид, Қайрат Ахметов, Қуат Ахметов, Дәурен Ермеков секілді тәжірибелі спортшылар мансабының соңына жақындаған. Ал Сергей Морозов пен Арман Оспанов спорттағы жолын аяқтаған.
«UFC-де жүрген жігіттердің өзі отызға таяп қалды. Шавкат Рахмонов, Асу Алмабаев, Әліби Ыдырыс, Бекзат Алмахан, Диар Нұрғожайдың жастары да отызға жақын. Жаңа буыннан үлкен үміт күттіретін екі-үш спортшы ғана бар», — деді Мекеев.
Федерация басшысы әуесқой ММА-да да бәсекелестік азайғанын атап өтті. Оның айтуынша, қазіргі жастардың физикалық дайындығы, күрес және грэпплинг деңгейі бұрынғыдай жоғары емес.
Сондай-ақ, Мекеев елде білікті жаттықтырушылардың тапшылығы бар екенін айтып, шілде айынан бастап өңірлерді аралап, мамандарды сертификаттау жұмыстарын жүргізетінін жеткізді.
About the Author
