World Athletics 2028 жылы Лос-Анджелесте өтетін Олимпиада ойындарына қатысу үшін іріктеу жүйесін жариялады, деп хабарлайды Sportbugin.kz.
Жаңа талаптарға сәйкес, спортшылар үшін олимпиадалық нормативті орындау бұрынғыдан да қиындай түсті. Олимпиадаға жолдама алудың жалғыз жолы — норматив орындау емес.
World Athletics мәліметінше, спортшылардың шамамен 40 пайызы белгіленген нормативтер арқылы, ал қалған 60 пайызы әлемдік рейтинг нәтижесінде Олимпиадаға қатысу мүмкіндігіне ие болады. Салыстырмалы түрде айтсақ, Париж-2024 Олимпиадасында жолдамалар 50/50 үлесінде бөлінген еді.
Норматив орындау кезеңдері спорт түрлеріне қарай әртүрлі мерзімде өтеді. Марафонда іріктеу кезеңі 2026 жылғы 1 қарашадан басталып, 2028 жылғы 30 сәуірге дейін жалғасады.
Ал 10 000 метрге жүгіру, көпсайыс, спорттық жүріс және эстафеталық жарыстарда норматив орындау мерзімі 2026 жылғы 19 желтоқсаннан 2028 жылғы 18 маусымға дейін белгіленген.
Қалған жеңіл атлетика дисциплиналарында іріктеу кезеңі 2027 жылғы 19 маусымда басталып, 2028 жылғы 18 маусымда аяқталады.
Спорттық жүрістен Олимпиада жолдамаларын үлестіруде командалық әлем чемпионаты маңызды рөл атқарады.
Бұл дисциплинада норматив қарастырылмаған. Қытайдың Хэфэй қаласында өтетін командалық әлем чемпионатындағы қорытынды хаттаманың үздік 12 спортшысы жартылай марафон қашықтығында Олимпиада жолдамасын иеленеді. Қалған 36 жолдама әлемдік рейтинг арқылы бөлінеді.
Айта кетейік, Лос-Анджелес Олимпиадасында жеңіл атлетика бағдарламасына жаңа дисциплина қосылады. Аралас 4×100 метрлік эстафета алғаш рет Олимпиада ойындарында өтеді.
About the Author
