Бүгін Париждегі жазғы Олимпиада ойындарының ашылу салтанаты өтеді. Бүкіл әлем көз тіккен ғаламдық жарыстың ашылуында көпшілік күтпеген ерекшеліктер көп болатыны айтылуда, деп жазады Sportbugin.kz.
Тарихта алғаш рет Олимпиада ойындарының ашылу салтанаты стадионда емес, өзен үстінде өтпек. Спортшылар шеруі Сена өзенінде ұйымдастырылады.
Әрбір делегация қайыққа мініп, алты шақырымдай жүзіп өтеді.
Ал өзен жағалауында әлемге әйгілі Эйфель мұнарасы орналасақан. Ерекше көріністі өзен жағасынан 300 мыңға жуық адам тамашалайды деген болжам бар.
Әзірге, Олимпиаданың ашылу салтанатын ұйымдастырушылар құпия ұстап отыр. Болжам бойынша, Олимпиада алауын әйгілі футболшы Зинедин Зидан жағуы мүмкін.
Сондай-ақ, әйгілі әншілер Селин Дион мен Леди Гага өнер көрсететіні айтылуда.
Олимпиаданың ашылу салтанаты Қазақстан уақытымен 22:30-да Qazaqstan, Qazsport, Jibek Joly және «Хабар» арналарынан тікелей таратылады.