Футболдан QJ лига турнирінің үшінші маусымы басталуға жақын. Астанада баспасөз мәслихатын өткізген ұйымдастырушылар биылғы басты ерекшеліктерге тоқталып, лиганың болашағына қатысты пікірлерін жеткізді, деп жазады Sportbugin.kz.
QJ лиганың үшінші маусымына Қазақстанның 18 өңірінен 54 команда қатысады. Жалпы есебі 542 матч ойнатылады, сондай-ақ, лигада доп тебетін жас футболшылар саны 1620-ны құрап отыр.
Биылғы басты жаңалықтардың бірі – қыздар лигасының ашылуы. 17 жасқа дейінгі қыздар арасындағы 8 команда QJ лиганың алғашқы титулы үшін жарысты бастамақ.
«Негізі, қыздар арасында жарыс өткізуді әу бастан ойлағанбыз. Сәті биыл түсіп отыр. Қыздар арасында да футболшы болуды армандайтындар көп. Ал әйелдер футболының танылуына қатысты теңсіздік біздің елімізде ғана емес, бүкіл әлемде бар. Біз осы олқылықтың орнын толтыруға тырысамыз. Әйелдер футболының дамуына да әрдайым басымдық береміз», — деді лига жетекшісі Рохус Шох.
Сонымен қатар, жасөспірім ұлдар арасындағы лигаға үш жаңа команда қосылды. Олар – «Хан Тәңірі», «Жеңіс» және футболдан 16 жасқа дейінгі Қазақстан Ұлттық құрамасы.
23 тамыз күні Алматыда дәстүр бойынша All Star матчы өтеді. Бұл жолы QJ лиганың үздік ойыншылары әйгілі мадридтік «Атлетико» академиясының тәрбиеленушілерімен кездеседі.
Лиганың Қамқоршылар кеңесінің төрағасы Тимур Турлов бұл жобаны қаржыландыруды тоқтатпайтынын айтты.
«Әйелдер лигасының ашылуы жасөспірімдер футболының көкжиегін одан әрі кеңейте түседі. Одан бөлек, біз әйгілі мадридтік «Атлетико»клубын шақырып отырмыз. Әлем мықтысы саналатын «Атлетиконы» Қазақстанға келуге көндіру де оңай емес. Осы орайда, біздің елшіміз көп көмектесті. Біз ойыншыларымызға мақсатты түрде мықты қарсылас таңдап отырмыз. Себебі, мықтылармен ойнау арқылы шеберлік артады. Негізі, отандық футболшыларды шетелдік академияларға оқуға жібергеннен гөрі, біздің футболдың жүйесін дамыту, бапкерлер мен мамандарды оқыту, халықаралық стандарттарға сай біліктілігін арттыру маңызды. Бір-екі ойыншы шетелде оқып келетін шығар, бірақ, бір-екі адамның шеберлігі ештеңе шешпейді. Сондай-ақ, менен қазір Қазақстан премьер-лигасындағы кәсіби клубтардың бірін сатып аласыз ба деп сұрайтындар көп. Мен белгілі бір клубтан гөрі, тұтас футбол жүйесін дамытуды қолдаймын. QJ лига жобасын одан әрі дамытып, қаржыландыра беремін», — деді Турлов.
Айта кетелік, QJ лиганың үшінші маусымы 19 сәуірде басталады. Биыл турнирді ұйымдастыру жұмыстарында жасанды интеллект те қолданылады.
Ақырыс Сейтқазы