Алматыда күрес түрлерінен ересектер арасындағы Қазақстан чемпионаты мәресіне жетті. Алты күнге созылған республикалық жарыста ел үздіктері анықталып, чемпиондар мен жүлдегерлер ұлттық құрамаға жолдама алды. Ал жарысқа қатысушылар мен қонақтар Алатау баурайындағы бәсекенің ұйымдастырылу деңгейі өте жоғары болғанын атап өтті, деп жазады Sportbugin.kz.
Қазақстан күрес федерациясы биылғы ел чемпионатын өткізуді Алматы қаласына сеніп тапсырған болатын. Алматы қалалық күрес федерациясы мен қалалық Дене шынықтыру және спорт басқармасы ұлттық біріншілікке бір айға жуық уақыт дайындалып, турнирдің әлемдік жарыстардан кем өтпеуін қадағалады.
Нәтижесінде, бір апта бойы «Алматы Аренаға» жиналған жанкүйерлер мен балуандар жарыстың ұйымдастыру деңгейін өте жоғары бағалады.
Ақтөбе облысынан келген жаттықтырушы Ерлан Мырзағұлов ел чемпионатын биік дәрежеде өткізу балуандарға да ерекше қуат беретінін жеткізді.
«Шыны керек, күрестен Алматыдағы ел чемпионатында жүргенде құдды әлем немесе Азия біріншілігіне барғандай әсер алдық. Тіпті, Азия деңгейіндегі жарыстар бұлай өтпейтін шығар. Мысалы, бокс пен дзюдодан Қазақстан чемпионаттары жыл сайын жоғары деңгейде ұйымдастырылады. Күрестегі турнирлер ала-құла өтіп жүрген соң, биылғы біріншіліктің басы-қасында жүрген жандарға шын риза болдық. Ішкі жарыстың бұлай өткені балуандарға да жақсы. Олар кілемді сезініп, бой үйретіп, кейін әлемдік бәсекелерге барғанда еш қысылмай, өзін еркін ұстайды», — дейді Ерлан Мырзағұлов.
Грек-рим күресінен Жамбыл облысының аға жаттықтырушысы Асылжан Байзақов ел чемпионатын өткізетін орынды дұрыс таңдау керектігіне ерекше мән берді.
«Негізі, ішкі чемпионатты Алматы сияқты ірі қалада өткізу маңызды. Мұндағы залдар мен орналасатын қонақүйлер, тіпті, ауа райына дейін спортшыларға ыңғайлы. Былтырғы біріншілік Астанада өткен. Күннің суықтығы балуандарға кәдімгідей әсер етті. Ал биылғы чемпионаттың еш кемшілігі жоқ, бәрі біз ойлағаннан асып түсті. Әлемдік жарыстардан кем түскен жоқ. Жарықтың түсуі, залдағы атмосфера, финалға шығар алдындағы таныстырылымдар ерекше есте қалды», — дейді Байзақов.
Әйелдер күресінен 53 келіде чемпион атанған Зейнеп Баянова турнирдің ұйымдастырылуын 100 балға теңесе, Шымкент қалалық күрес федерациясының жетекшісі Ермек Байдуашев: «Қазақстан чемпионаты әлем чемпионатынан да артық өтті», — деп қысқа қайырды.
Алматы қалалық күрес федерациясының Бас хатшысы Байболсын Құрманбековтің мәліметінше, күрес түрлерінен биылғы Қазақстан біріншілігіне жалпы есебі 20 команда, 55 төреші және 667 балуан қатысқан.
«Біз түрлі жас деңгейіндегі Қазақстан чемпионаттарын ұйымдастырып, біраз тәжірибе жинадық. Сондықтан, биылғы доданы өткізу бізге айтарлықтай қиындық тудырған жоқ. Алматы қалалық спорт басқармасы «Алматы Арена» спорт кешенін тегін берсе, Спортты дамыту дирекциясы спортшылардың жол шығындарын көтерді. Бірлесіп істеген жұмыс қашан да өз нәтижесін береді. Еліміздің барлық өңірінен келген командалардың басын қосып, ұлттық чемпионатты абыроймен өткізу біз үшін де үлкен мәртебе», — дейді Байболсын Данияұрлы.
Айта кетелік, күрес түрлерінен Қазақстан біріншілігі 1-6 желтоқсан аралығында «Алматы Арена» спорт кешенінде өтті.
About the Author
