Қарағандыда Олимпиада чемпионы Данияр Елеусіновтің жарына қатысты қылмыстық іс қозғалды, деп жазады Sportbugin.kz
Қарағанды облыстық полиция департаментінің мәліметінше, боксшының жұбайы Саида Елеусінова қатысқан тұрмыстық жанжал бойынша сотқа дейінгі тергеу басталды.
Оқиға 2026 жылдың наурыз айының басында орын алған.
Алдын ала мәліметтерге сәйкес, жәбірленуші тарап Саида Елеусіноваға күш қолданды деген айып тақса, оның өзі бұл жағдайды қарапайым көршіаралық дау ретінде бағалаған.
Сондай-ақ Саида Елеусінова жанжалдың күйеуінің танымалдылығына байланысты әдейі ушықтырылғанын алға тартқан. Қос тарап та бір-біріне қарсы арыз түсіргені белгілі болды.
Аталған дерек бойынша Майқұдық полиция бөлімінде Қазақстан Республикасы Қылмыстық кодексінің 108-1-бабы — денсаулыққа қасақана жеңіл зиян келтіру фактісімен екі бірдей сотқа дейінгі тергеу тіркелген.
Қазіргі уақытта іс аясында бірнеше сот-медициналық сараптама тағайындалған.
Егер кінәсі дәлелденсе, Саида Елеусіноваға 200 айлық есептік көрсеткішке дейін айыппұл салу, сол мөлшерде түзеу жұмыстары, 200 сағатқа дейін қоғамдық жұмысқа тарту немесе 50 тәулікке дейін қамау жазасы қарастырылған.
About the Author
