Боксшы Бекзад Нұрдаулетов Сабыржан Аққалықов пен өзбекстандық Жавохир Умматалиев арасындағы жекпе-жекке қатысты өз пікірін білдірді, деп жазады Sportbugin.kz.
«Сабыржанның жекпе-жегін шәкірттерімізбен бірге отырып қарадық. Өз ойым бойынша, екінші раундта да Сабыржан айқын басымдық танытып, 5:0 есебін тіркеді. Жаңа салмаққа ауысуы оған еш кедергі келтірмегені жекпе-жек барысында анық байқалды.
80 келі салмақтағы қазіргі әлем чемпионы Умматалиевке қарсы өте жоғары деңгейде өнер көрсетті. Басында жаңа салмаққа бейімделуі қалай болар екен деген ой болған еді. Дегенмен жекпе-жектен кейін бұл шешімнің дұрыс болғанына көзіміз жетті. Мен үшін бұл кездесуде Сабыржан жеңілген жоқ.
Алдағы уақытта Сабыржанға да, ұлттық құрамаға да сәттілік тілеймін», — деді Бекзад Нұрдаулетов.
Айта кетейік, Бекзад Нұрдаулетов – жартылай ауыр салмақта (81 келі) әлем және Азия чемпионы, Олимпиада ойындарының қатысушысы. Қазіргі таңда ол Маңғыстау облыстық бокс бойынша олимпиадалық резервтің мамандандырылған балалар мен жасөспірімдер мектебінің басшысы қызметін атқарады.
About the Author
