Қазақстандық шахматшы Бибісара Асаубаеваның анасы Лиана Таңжарықова Дүниежүзілік шахмат Олимпиадасында Өзбекстан құрамасына жанкүйер екенін айтты, деп жазады Sportbugin.kz.
Лиана Таңжарықова әлеуметтік желідегі парақшасында әйелдер құрамасында Қазақстанға, ал ерлер арасында Өзбекстанға жанкүйер болатынын жеткізді.
«Менен Олимпиадада қай елге жанкүйер болатынымды жиі сұрайды. Жауап қарапайым: мен екі елге де жанкүйермін.
Әйелдер құрамасы — әрине, Қазақстан! Бибісара Асаубаева бастаған қыздарымыз осы қонақжай елде бар күшін салып, алтын жүлде алуға тырысуы керек.
Ал ерлер арасында — Өзбекстан! Жігіттер жас, өте амбициялы әрі талантты. Жавохир Синдаровқа бар жүрегіммен жанкүйермін.
Мен Қазақстанның оңтүстігінде дүниеге келіп, өзбек махалласында өстім. Сондықтан мен үшін бұл бәсекелестік емес, екі бауырлас халықтың ортақ мерекесі», — деді ол.
Айта кетейік, Қазақстанның әйелдер құрамасы турнирдегі алғашқы бес кездесуінің барлығында жеңіске жетті. Отандастарымыз Иордания, Колумбия, Грекия және Испания құрамаларын ұтты.
Ал Өзбекстанның ерлер құрамасы бес турдан кейін 10 командалық ұпай жинап, Үндістан және Германиямен бірге турнир кестесінің көшін бастап келеді.
About the Author
