Алматы қаласында мәнерлеп сырғанаудан Денис Тен мемориалы өтіп жатыр, деп жазады Sportbugin.kz.
Халықаралық жарыстың ағылшын және орыс тілінде өтіп жатқаны, қазақ тілінің қолданылмауы әлеуметтік желі қолданушылары мен жанкүйерлердің сынына ұшырады.
«Қазақша қайда? Жалпы, қай елде өтіп жатқанын естен шығарып алған жоқсыздар ма? Қазақстанда өтетін жарыстардың ағылшын тілінде өтетін болғаны қашан? Бұл қазақ тілін менсінбеушілік пе?» — деп жазды желі қолданушылары.
Жанкүйерлер халықаралық деңгейдегі жарыстарда шет тілдерін қолдануға қарсы емес екенін, алайда қазақ тілінің де қатар қамтылуы керектігін алға тартады.
Айта кетейік, Денис Тен мемориалы алғаш рет 2019 жылы Алматы қаласында ұйымдастырылды. 2021 жылдан бастап турнир Халықаралық конькимен жүгірушілер одағының (ISU) Challenger Series беделді жарыстар сериясына енді. Бұл спортшыларға халықаралық рейтингтік ұпай жинауға мүмкіндік берді.
Жарыстың ұйымдастырушысы — Денис Тен қоры мен Қазақстанның Ұлттық конькимен жүгірушілер федерациясы.
About the Author
