Алматыда дзюдодан Олимпиадаға іріктеу турнирі аяқталып, 60 келі салмақта Париж ойындарына қатысатын спортшы анықталды, деп жазады Sportbugin.kz.
Айта кетелік, бұл салмақта үш қазақ балуаны Олимпиадалық рейтингке енді. Соңғы сәтте жазғы ойындарға қатысатын балуандарды басшылық өзара белдестіру арқылы анықтады.
Алматыда өткен шағын турнирде Елдос Сметов жеңіске жетті. Ол алдымен Мағжан Шамшадинді, кейін Нұрқанат Серікбаевты жеңді.
Бұл Елдостың мансабындағы үшінші Олимпиада болмақ. Бұған дейін ол Рио Олимпиадасында күміс, Токио Олимпиадасында қола жүлдегер атанған.
Фото: Қазақстан ҰОК баспасөз қызметі