«Семей» футзал клубы «Барселонаның» бұрынғы ойыншысы, Феррао деген атпен танымал Карлос Вагнер Гуларте Филомен келісімге отырды.
33 жастағы бразилиялық – әлемдік деңгейдегі ойыншы. Бұған дейін Феррао бразилиялық «Кортьяна» мен «Крона», ресейлік «Тюмень» және испандық «Барселона» клубтарында ойнап, олармен екі реттен ел чемпионатын және УЕФА Чемпиондар лигасын жеңіп алған. Сонымен қатар, Бразилия құрамасының ойыншысы үш жыл қатарынан (2019, 2020 және 2021) әлемнің үздік ойыншысы деп танылды.
«Шынымды айтсам, менде жаңа сынаққа түсуге үлкен ынта болды. «Семей» жобасымен таныса бастағанда қуанып қалдым. Менің ойымша, бұл жобада жеңімпаздың бет-бейнесі бар. «Семейдің» нені білдіретінін тереңірек түсінген сайын мұнда ойнауға деген құштарлығым одан сайын күшейе түсті. Енді мен мұндамын. Болашақта мен бар күшімді осы клубтың намысын қорғауға және бірге үлкен жетістіктерге жетуге жұмсаймын », — деді Феррао мансабындағы жаңа кезеңі туралы.
«Біз Ферраоның біздің клубқа ауысқанын хабарлауға қуаныштымыз. Оның жаңа сынаққа түсуге және біздің жобаға қосылуға деген ұмтылысы көп нәрсені айтады. Феррао – қайталанбас шеберлігі мен әлеуеті зор ойыншы, оның біздің командаға елеулі үлес қосатынына сенімдіміз. Оның ойынға деген құштарлығы мен жеңіске деген ұмтылысы біздің клубтың құндылықтарына толығымен сәйкес келеді. Оның көмегімен жаңа белестерді бағындырып, жоғары жетістіктерге бірге жететінімізге сенімдіміз. Семейге қош келдіңіз, Феррао», — деді «Семей» ФК бақылау кеңесінің мүшесі Азамат Аселкан.
Сондай-ақ «Семей» футзал клубының өкілдері клубтың алдағы маусымға қызу дайындалып жатқанын атап өтті. Ферраомен ынтымақтасу – команданы нығайту жолындағы үлкен қадам.
Айта кетейік, «Семей» – Қазақстандағы жалғыз жеке футзал клубы. Клубтың иесі – Семей қаласының тумалары бар қазақстандық EA Group холдингі. 2023/24 маусымында «Семей» футзал клубы клубтың құрылғаннан кейінгі бірінші жылы-ақ алматылық «Қайраттың» 20 жылдан астам уақытқа созылған гегемониясын бұзып, Қазақстан чемпионы атағын жеңіп алды.
Келесі маусымда семейлік клуб УЕФА Чемпиондар лигасына қатысып, португалиялық «Спортинг», венгриялық «Халадаш» және алматылық «Қайрат» командаларымен бір топта өнер көрсетеді.