Supernovas inDrive коммерциялық емес жобасы Қазақстанда ерекше қарқын алып келеді. Әлемнің сегіз мемлекетінде қолданысқа енген жоба біздің байтақ еліміздің әр түкпірін қамти бастады. Supernovas – шалғай ауылдар мен елдімекендердегі ойын балаларына тегін футбол үйретіп, спорт арқылы құндылықтарды насихаттуға, зорлық-зомбылықсыз спортты дамытуға бағытталған. Бүгінде аталған жоба бойынша жұмыс істейтін бапкерлер D лицензиясын алу үшін біліктілік арттыру курстарынан өтіп тұрады. Бұл — Supernovas және Қазақстан футбол федерациясының бірлесе дайындаған жұмыстарының бірі. Осы орайда, Sportbugin.kz сайты Supernovas inDrive жобасы аясында балаларға футбол ілімін үйретіп жүрген бапкерлерден сұхбат алған болатын.
Supernovas мені жан-жақты дамытты
Жанат Әшімов Supernovas жобасында екі жылдан бері бапкерлік қызмет атқарып келеді. Ол Солтүстік Қазақстан облысындағы Благовещенка ауылында балаларға футбол үйретеді. Жанат балалармен жұмыс істеуді жүрек қалауымен таңдаған және күнделікті жаттығудың әр сәтінен ләззат алады.
«Футболға деген махаббат мені осы жобаға алып келді. Жоба туралы әлеуметтік желіден оқып, өз түйіндемемді жіберген едім. Кейін мамандар хабарласып, түрлі кезеңдерден өткен соң, жұмысқа алынған алты бапкердің қатарына ендім. Содан бері екі жыл өтіпті. Бүгінде мен екінші тобымды жасақтап үлгердім. Қазіргі таңда менің тобымда 5 пен 12 жас аралығындағы 65 бала жаттығады. Олардың ішінде ұлдар да, қыздар да бар. Біз оларды гендерлік белгілеріне қарай бөлмейміз. Бәрі де бір алаңда бірдей дайындалады», — дейді Жанат.
Супер жұлдыз шығатын күн алыс емес
Бапкердің айтуынша, бұл жоба миллиондардың ойынына арналған футболды кеңінен таратып қана қоймай, жаттықтырушылардың жан-жақты дамуына да үлкен үлес қосып жатыр.
«Supernovas жобасы біздің бір орында тұрып қалмай, алға басуымызға септігін тигізуде. Бапкерлерге арналған түрлі онлайн және оффлайн семинарлар өтеді. Біз жаттығу процесінің қыр-сырын меңгеруден бөлек, балалармен, ата-аналармен қарым-қатынас орнатуды, олардың психологиясын түсінуді үйрендік. Мен бұл жобадан өзіме үлкен тәжірибе, сарқылмас ілім алдым», — дейді ол.
Сондай-ақ, Жанат Әшімов Supernovas жобасынан түбінде супер жұлдыз шығатынына сенімді.
«Біз балалардан әлемге танымал әйгілі спортшылар шығаруды мақсат етпейміз. Біздің мақсат – футбол арқылы балаларды бұқаралық спорт түрлеріне тарту, олармен жақсы қарым-қатынас орнатып, зорлық-зомбылықсыз спортқа жол ашу. Бірақ, ішкі түйсігім бір нәрсені сезеді. Түбінде осы Supernovas жобасынан әйгілі футболшы өсіп шығады. Бір жұлдыздың болары анық. Өйткені, футбол – миллиондардың ойыны. Мұндай ойын барша балақайға қолжетімді болуы керек. Сондықтан, осындай жобалар бізге ауадай қажет», — дейді бапкер.
Supernovas ШҚО-да: мұғалім қалай бапкер болды?
40 жастағы Алмас Наурызбаевтың Supernovas жобасына бапкер ретінде қосылғанына бір жылдан асты. Осы аралықта ол жаттықтыратын «Supernovas Боран» футбол клубы аудан чемпионы атанып, облыс біріншілігінде үздік үштікке енген.
Алмас Шығыс Қазақстан облысы, Марқакөл ауданы, Боран ауылында мұғалім әрі Supernovas жаттықтырушысы болып жұмыс істейді.
«inDrive компаниясының «Supernovas — шалғай қала мен ауылдарға арналған тегін футбол секциялары» жобасына қосылғаныма биыл бір жыл толады. Жоба туралы алғаш Instagram парақшасынан білдім. Тестілеу мен сұхбаттасудан сүрінбей өтіп, осы жобаның жаттықтырушысы атандым. Сол кезде қуанышымда шек болмады.
2007 жылы ауылға жас мұғалім болып келгенімде-ақ, балаларғааа футбол үйретуді бастап кеттім. Көрші ауылдармен жарыс ұйымдастырып, кейін мектеп лигасын аштық. Газет шығарып, әлеуметтік желіге ойындар туралы мақалалар жаздым. Әріптес ұстаздар да бұл бастаманы қолдап, өз командаларын жасақтаған болатын. Бірақ мұның бәріне қаражатты өзіміз таптық. Өз еркімізбен жасалған дүние ғой. Кейде қол қысқа болғандықтан, доп жарылып қалса, ойынды тоқтататын едік. Қазір сол күндер бізге қымбат естелік болып қалды.
Содан бері «Боран» футбол клубының намысын қорғаған талай ойыншыны тәрбиелеп, көптеген жарыста жүлделі орындарға ие болдық. Қазір бізде футболға керектінің бәрі бар, бәрі де жеткілікті. Команда атауын да жаңартып, «Supernovas Боран ФК» деп өзгерттік», — дейді ол.
Енді бізде қыздар да жаттығады
Алмас Болатұлы бастаған футбол үйірмесінде 7-12 жас аралығындағы 47 бала жаттығады. Оның ішінде 17 қыз, 30 ұл бар.
«Тағы бір қуантатын ерекше жайт бар. Бұл — Supernovas Girls командасының құрылуы. Бұған дейін тек бір қыз баланы ғана жаттықтырыппын, ал бұл жобадан кейін бірден 7 қыз үйірмеге қатысуға ниет білдірді. Шыны керек, қыздардың футболға дәл бұлай қызығушылық танытқаны мені қуантады. Жаттығудан қалмайды ешбірі, күзге жауынға да, қысқы аязға да қарамайды. Футболға деген махаббат оларды алға жетелеп отыр.
Биыл біз өз тарихымыздағы алғашқы түлектерді — 2011–2012 жылы туған футболшыларды шығарып салдық. Олар аудан чемпионы атанып, облыстық жарыстарда екі жыл қатарынан 3-орын иеленді. Мен олардың жетістігіне шын жүректен қуандым. Мақтан етемін!», — дейді Алмас Наурызбаев.
Оливер Кан да, Куртуа да боламын
Бүгінде Алмас өз оқушыларын әлемдік футбол жұлдыздарынан кем көрмейді.
«Мен үшін олар әлдеқашан супержұлдыз атанып қойғанн. Бұрын Роналдиньо, Анри, Месси, Роналдо сынды ойыншыларға тамсанатынмын. Қазір футболды тек тактика мен трендтерден қалып қоймау үшін көремін. Өйткені, мен үшін ең шынайы футбол — балалар футболы.
Балалармен бірге өзім де алаңда жүгірем. Әрқайсысына футбол жұлдыздарының лақап атын қойып, ойынға ерекше көңіл бөлемін. Өзім қақпада тұрам, бірде Оливер Кан, бірде Нойер, кейде Куртуа боламын. Балалар маған гол соққанда қатты қуанады. Солардың қуанғаны мені алға жетелеп, шабытымды арттыра түседі.
Әлі есімде, бір ойыншым алғаш рет қарсылас қақпасына гол соққанда, бүкіл команда болып қуандық. Өзім де алаң шетінде тұра алмай, ортаға жүгіріп шығып, баламды көтеріп алдым. Дәл осындай сәттер өмірді де, футболды да әрлей түседі», — дейді ол.
Ең шынайы футбол – балалар футболы
Алмас Наурызбаев мұндай жобалардың нәтижесі тұтас спортты дамытуға әсер ететінін жасырмайды.
Supernovas секілді бастамалар — футболды тек қалада емес, ауыл-аймақтарда да қолжетімді етудің ең тиімді жолы. Қазақстандағы көптеген дарынды балалар шалғай ауылдарда, мүмкіндігі шектеулі ортада өсіп келеді. Оларға тегін жаттығу, қолдау, мотивация қажет.
Мұндай жобалар балалардың бос уақытын тиімді өткізуіне көмектеседі. Жас дарындарды анықтап, болашағына жол сілтей аламыз. Спортқа деген сүйіспеншілік арталы, жаттықтырушылардың тәжірибесі толысады. Сондықтан, бұл жоба біздің болашаққа салған инвестициямыз деп білемін. Бұл сөзіме Supernovas дәлел», — деп ойын ортаға салды бапкер.
Қазіргі таңда Алмас осы жобаның белді мүшесіне айналғанына бек қуанышты.
«Бұл жоба — менің өмірімдегі жаңа белес, жаңа мүмкіндік. Қосылған сәттен бастап, біліктілік арттыру курстары басталып кетті. Қазақстанның түкпір-түкпірінен келген жаттықтырушылармен танысып, бір толқында, бір көзқараста екенімізге қуандым.
Жасы үлкен бапкерлер мені жылы қабылдап, тәжірибесімен, ақыл-кеңестерімен бөлісті. Бұл жоба маған балалармен жұмыс істеудің жаңа әдістерін үйретті, сабыр мен жүйелілікке баулыды.
Қандай сұрақ болса да, бас әдіскеріміз Семен аға мен бапкерлер кеңесі үнемі көмек беруге дайын. Өзімді нағыз жаттықтырушы ретінде жаңа деңгейге көтердім деп сеніммен айта аламын», — дейді ол.