Халықаралық Олимпиада комитеті 2030 жылғы қысқы ойындарға дзюдо, велокросс және кросс-жүгіру сияқты жазғы спорт түрлерін енгізу мүмкіндігін қарастыруда. Мұндағы мақсат – қысқы Олимпиаданың ауқымын кеңейту ме, әлде нәсілшілдікпен күрес пе деген сұрақ туындауда, деп хабарлайды sportbugin.kz
World Athletics халықаралық федерациясының басшысы Себастьян Коу кросс-жүгіру мен велокроссты қысқы ойындарға қосу мақсатында келіссөздер жүргізіліп жатқанын айтты. Деректерге сүйенсек, МОК-тың жаңа президенті Кирсти Ковентри бұл мәселе бойынша арнайы комиссия құрған.
“Кирсти, сөзсіз, Олимпиада бағдарламасына жаңаша қарауға дайын. Ол бұрынғы қалыптасқан шеңберден шығып, қыс,жаз мезгілдерінің үйлесімді тұстарына назар аударуға әзір”, – деді Коу The Times басылымына берген сұхбатында.
Сонымен қатар Себастьян Коу кросс-жүгіруді қысқы Олимпиада ойындарына енгізудің себебін африкалық спортшылардың әлеуетін шектемеу қажеттілігімен түсіндірді.
Каратэ мен күрес секілді спорт түрлерінің арасынан неліктен дәл дзюдо таңдалғанына әзірге нақты жауап жоқ.
Бірақ Африканы қысқы спортқа қосу қаншалықты орынды деген сұрақ туындайды. Өйткені олардың жазғы Олимпиаданың кейбір түрлерінің өзінде лайықты деңгейде өнер көрсетуге ресурстары жетпейді. Осы тұрғыдан алғанда, африкалықтардың мүддесін қорғауды «нәсілшілдікпен күрес» деп атаудың мәні қандай? Бұл – Олимпиада комитетінің адам құқықтары үшін күрес деген сәнді трендке ілесуі ме, әлде спорттағы шынайы теңдікті сақтауға деген талпынысы ма? Сұрақ көп, жауап аз.
Айта кетейік, түпкілікті шешім ХОК-тың 2025 жылдың қазан айында өтетін жиынында қабылданады. Егер бұл өзгерістер мақұлданса, дзюдо 2030 жылғы қысқы Олимпиаданың бағдарламасына енуі мүмкін.
Бишер Дильназ
About the Author
