Көркем гимнастикадан Қазақстан құрамасының мүшелері Эрика Жайлауова мен Милана Парфилова үлкен спорттан кетті. Бұл туралы Қазақстан гимнастика федерациясының президенті Әлия Юсупова мәлім етті, деп жазады Sportbugin.kz.
«Жақында маған еліміздің намысын абыроймен қорғаған екі спортшымыз хабарласты. Соның бірі — Эрика Жайлауова шетелге оқуға түсетінін айтып, спортпен қоштасатынын жеткізді. Оған ақ жол тілеймін, талай ірі жарыстарда жүлделі болды. Содан соң, Милана Парфилова спортшылық мансабын аяқтайтынын айтты. Ол спорттан алыстаған жоқ, бапкер ретінде қызметін бастады. Мен Милананың өте жақсы жаттықтырушы боларына сенемін. Себебі, балалармен бірден тіл табысатын қасиеті бар. Екі спортшымызға алғысым шексіз, оларға тек сәттілік тілеймін!», — деді Әлия Мақсотқызы.
Айта кетелік, Эрика Жайлауова белгілі хоккейші, Қазақстан құрамасының бас бапкері Талғат Жайлауовтың қызы. Ол командалық сында Азия чемпионы және Азия ойындарының күміс жүлдегері атанған.
Милана Парфилова — көркем гимнастикадан Азия ойындарының жекелей сында қола, командалық сында күміс жүлдегері.
About the Author
