Қазақстан спорты легионерлердің көптігімен ерекшеленеді. Бұған дейін посткеңестік елдерден спортшы алдырсақ, енді атлеттер алыс Африкадан да келіп жатыр. Жеңіл атлетикадан әлем чемпионатының алтынын сыйлаған Нора Джеруто соның дәлелі. Осы орайда, Sportbugin.kz әр жылдары Қазақстан атынан Олимпиада мен әлем чемпионаттарына қатысып, жүлде алған соң шетелге кетіп қалған спортшылар тізімін жасады.
Мхитар Манукян (Армения)
Грек-рим күресінен екі дүркін әлем чемпионы. Афины Олимпиадасының қола жүлдегері. 1997 жылы Дәулет Тұрлыхановтың шақыртуымен Қазақстанға келіп, 2015 жылы АҚШ-қа көшіп кетті.
Геннадий Лалиев (Ресей)
Афины Олимпиадасының күміс жүлдегері, әлем чемпионатының қола жүлдегері. Қазіргі таңда Владикавказда тұрады. 1999 жылдан бері Қазақстан намысын қорғаған.
Леонид Спиридонов (Якутия)
Спиридонов ұзақ жылдар бойы еркін күрестен Қазақстан командасының мүшесі болды. Ол екі бірдей Олимпиадаға қатысып, жүлдесіз қалған. 2006 жылғы Азия чемпионы, Азия ойындарының қола жүлдегері. Қазіргі таңда Якутияның спорт министрі.
Алла Важенина (Ресей)
Ауыр атлетикадан Бейжің Олимпиадасының алдымен күміс жүлдегері атанды. Кейін қарсыласы допингпен ұсталып, Олимпиаданың алтынын иеленді. Олимпиададан соң дереу Ресейге қайта оралып, спорт мектебін басқарған. Қазіргі таңда Губкинск қаласындағы спорт басқармасының басшысы. 2007 жылға дейін Ресей намысын қорғады.
Таймураз Тигиев (Ресей)
Осетиндік балуан еркін күрестен Бейжің Олимпиадасының күміс жүлдегері атанған. 2014 жылы оның сынамасынан допинг табылып, жүлдесінен айырылды. Тигиев те өзінің туған жеріне қайта оралған.
Даниал Гаджиев (Ресей)
Грек-рим күресінен Лондон Олимпиадасында Қазақстан балуандары арасынан жалғыз медальді жеңіп алды. Батыс Қазақстан облысының атынан сынға түсіп, қымбат көлік, бағалы сыйлықтар алды. Қазіргі таңда балуанның нақты қайда екені туралы мәлімет жоқ. Бірақ жергілікті спортшылар Гаджиевтің атамекеніне оралғанын айтады.
Георгий Цурцумия, Марид Муталимов (Грузия, Ресей)
Цурцумия Афины Олимпиадасының күміс жүлдегері. Ұзақ жылдар бойы Қазақстанда еңбек етті. Қазір оның нақты қай елде жүргені белгісіз.
Марид Муталимов Бейжің Олимпиадасының қола жүлдегері. Қазіргі таңда Маридтің нақты қайда және немен айналысатыны туралы жанкүйерлер біле бермейді.