Еркін күрестен Қазақстан командасының үздігі Азамат Дәулетбеков Азия чемпионатының финалында айқасады, деп хабарлайды Sportbugin.kz.
Азамат еркін күрестен 86 келі салмақта сынға түсуде. Жартылай финалда ол қытайлық Пейлон Лиді 11:0 есебімен ұтты.
Финалда Дәулетбеков өзбекстандық Жабраил Шапиевпен белдеседі. Дәл осы балуан Дәулетбековты Азия ойындарында жүлдеден қаққан болатын.
Егер бүгін Азамат өзбек қарсыласын ұтса, былтырғы күзде кеткен есесін қайтарады.
Сондай-ақ, финалда жеңіске жетсе, Азамат Дәулетбеков қатарынан үш рет Азия чемпионатында жеңіске жеткен балуан атанады.
Азаматтан бөлек, 61 келі салмақтағы Асыл Айтақын да құрлық додасының финалына шықты. Ол ақтық сында қырғызстандық Тайырбек Жұмашбекұлымен белдеседі.