Бокстан Қазақстан әйелдер құрамасы Париж қарсаңындағы ең соңғы жаттығу жиынына кіріседі. Бұл туралы команданың бас бапкері Елдос Сайдалин айтты, деп хабарлайды Қазақстан ҰОК ресми сайты.
Олимпиада алдындағы жаттығу жиыны 9-21 шілде аралығында өтеді.
«Жақында ғана Жанашар ауылындағы базада екі апталық жаттығу жиынын ойдағыдай өткіздік. Олимпиадаға баратын үш боксшымызға командаластары көмекке келді. Қазір құрама мүшелері аздаған үзіліс алды. 8 шілдеде қайта жиналамыз.
21 шілдеде Парижге ұшып кетеміз. Кейін сол жақтағы жағдайға қарай жаттығуды жалғастырамыз. Боксшы қыздарымыздың жағдайы жақсы. Оларды Олимпиадаға нағыз бабында апару- біздің міндетіміз.
Олимпиада ойындарына үш қызға спаррингтік серіктес болатын тағы үш боксшыны алып кетуді жоспарлап отырмыз. Әзірге, нақты кімнің баратынын ақылдасудамыз», — деді бас бапкер.
Еске сала кетейік, Париж Олимпиадасында бокстан Қазақстан әйелдер құрамасынан үш спортшы сынға түседі. Олар: Назым Қызайбай (50 келі), Карина Ибрагимова (57 келі) және Валентина Хальзова (75 келі).