Қытайдың Харбин қаласында өтіп жатқан қысқы Азия ойындарында қазақстандық фристайлшылар жеңістің ең биік тұғырына көтерілді, деп жазады Sportbugin.kz.
Шерзод Хаширбаев пен Роман Иванов фристайл акробатикадан синхронды секіруден Азия ойындарының чемпионы атанды. Олар шешуші сәтте 97,92 ұпай жинап, қытайлық Олимпиада чемпиондарын артта қалдырды.
Күміс және қола медальді Қытайдың негізгі және қосалқы құрамы иеленді.
Аталған спорт түрінде әлем бойынша Қытай құрамасының көш бастап тұрғанын естеріңізге саламыз.
«Бүгінгі күн қазақ еліне үлкен қуаныш сыйлап жатыр. Біз өнерімізге ризамыз. Бірінші күні үшінші орын, екінші күні күміс, енді міне үшінші күні алтын. Өте қуаныштымын. Қолдауларыңызға рақмет! Өте ризамын, жігіттер берген тапсырманы екі етпей орындады,»- дейді бас бапкер Бағлан Іңкәрбек ҰОК сайтына берген сұхбатында.
Айта кетелік, қысқы Азия ойындарында қазақстандық фристайл-акробатика өкілдері үздік нәтиже көрсетуде. Аяна Жолдас әйелдер арасында қола медаль алса, аралас командалық сында Қазақстан күміске қол жеткізді.
Сондай-ақ, Ардана Маханова мен Аяна Жолдас синхронды секіруден қола жүлдегер атанды.
Фото: Нұрғали Жұмағазы, Спортты дамыту дирекциясы