Былтыр Қазақстан күрес түрлері федерациясы 2024 жылдың қорытындысы бойынша ел үздіктерін марапаттады. Сол жиында Демеу Жадыраевтың жеке бапкері Боранбек Қоңыратовқа қандай да бір марапат берілген жоқ. Федерацияның бас хатшысы Димаш Сұлтанов мұның себебін Sportbugin.kz тілшісіне түсіндірді.
«Боранбек Қоңыратов Париж Олимпиадасынан кейін жүлдегердің жеке бапкері ретінде Үкімет қаулысына сай барлық ақшалай сыйақыны алған. Сондай-ақ, ерен еңбегі үшін Президент жарлығымен «Парасат» орденімен марапатталды.
Ал 2022 жылдан бастап Федерация жыл қорытындысы бойынша үздік спортшылар мен бапкерлер марапаттайды. Бұл тұста Федерация ең алдымен жарыстарға балуандарды кешенді түрде дайындаған ұлттық құрама командалардың бас және аға бапкерлерін ақшалай сыйақымен марапаттайды.
Мысалға осы жылы біздің спортышлар әр алуан халықаралық додалардан ел қоржынына жалпы 110 жүлде әкелді. Демек, әр спортшыны құрамаға үкілеп қосқан жеке бапкері бары сөзсіз. Ал дәл осы құраманы одан әрі жетістікке жеткізу – аға және бас
бапкердің мойынында. Өзіңіз білетіндей соңғы 2-3 жылда жастар құрамасы тамаша жеңістерге қол жеткізіп, алтын медалдармен қуантып жүр.Сол себепті осындай нәтиже көрсеткені үшін Федерация «Үздік бапкер» ретінде грек-рим күресінен U-20 құрама командасының бас
бапкері Қонысбек Түкеновты атап өтті», — деді Димаш Сұлтанов.