Футболдан 17 жасқа дейінгі Қазақстан қыздар құрамасы Еуропа чемпионатына іріктеу аясында Солтүстік Ирландияда үш матч өткізеді. Соның біріне трансгендер төреші, израильдік Сапир Берман төрелік етеді, деп хабарлайды segodnya.co басылымына сілтеме жасаған Sportbugin.kz.
Атап айтар болсақ, 23 наурыз күні өтетін Қазақстан мен Черногория арасындағы кездесуде Сапир Берман бастаған төрешілер тобы жұмыс істейді.
ФИФА жынысын ауыстырып, еркектен әйелге айналған Сапир Берманға халықаралық матчтарға төрелік етуге рұқсат берді. Ол Израиль чемпионатының үздіктері «Маккаби» мен «Хапоэль» арасындағы матчтың бас төрешісі болып үлгерді.
Енді Сапир халықаралық матчтарына дайындалуда. Алдымен ол Солтүстік Ирландия мен Черногория, кейін Қазақстан мен Черногория арасындағы кездесулерге төрелік етеді.
Берман 14 жыл бойы футболда төрелік етіп келеді. Алайда, ол жынысын ауыстырған соң алғаш рет ірі матчтарға шақырту алып жатыр.
Оның ендігі арманы — Чемпиондар лигасында төрелік жасау.