Күрес әлеміндегі беделді тұлға Дәулет Тұрлыханов Азия күрес федерациясының (UWW Asia) президенті қызметінен кетті, деп жазады Sportbugin.kz.
Азия күрес қауымдастығының жаңа басшысы болып иорданиялық Мохаммед Әл-Авамала тағайындалды. Ол Иорданияда өткен жиында 38 дауыстың 34-ін жинап, 2028 жылға дейін UWW Asia ұйымын басқару мандатын алды.
Дәулет Тұрлыханов бұл лауазымда 2017 жылдың мамыр айынан бері қызмет етіп келген.
Бұл өзгеріс Азия күресіндегі маңызды кадрлық ауысулардың бірі болып отыр. Себебі, Тұрлыхановтың басқаруы кезінде құрлықтағы күрес деңгейі айтарлықтай көтерілді, ал жаңа басшы осы қарқынды сақтай ала ма, жоқ па – бұл алдағы жылдары белгілі болмақ.
Сонымен қатар, Қазақстандық күрес жанкүйерлері Тұрлыхановтың алдағы жоспарларына да қызығушылық танытуда. Ол саясатта өз қызметін жалғастыра ма, әлде спорт саласында жаңа рөл атқара ма – бұл сұрақтар әлі де ашық күйде қалып отыр.
Айта кетелік, қазіргі таңда Дәулет Тұрлыханов Қазақстан күрес түрлері федерациясын басқарып отыр.