Иордания астанасы Амман қаласында күрестен құрлықтық деңгейдегі жарыстар жиі өтіп тұрады. Күрестен биылғы Азия біріншілігі де осы корольдікте ұйымдастырылмақ. Осы орайда, Sportbugin.kz турнир алдындағы шолуды назарларыңызға ұсынады.
Күрес әлемі жыл сайын жаңа есімдерді шығарып, сенсацияларға толы жарыстар өткізеді. Биылғы Азия чемпионаты да спорт сүйер қауымның басты назарында. Бұл жарыста күтпеген шешімдер де, сенсациялық жеңістер де болуы мүмкін.
Қазақстандық балуандар барлық салмақ дәрежелері бойынша бозкілемге шығады.
Еркін күрес: Екі чемпионымыз аттанды
Биылғы чемпионаттың басты интригаларының бірі – Қазақстандық балуан Ризабек Айтмұханның жарысқа қатысуы. Ол алғашында Азия біріншілігіне қатыспайды деп айтылған еді. Бірақ кейіннен бас бапкер шешімін өзгертіп, 97 келіде Ризабекке сенім артып отыр. Бұл бәсекеде қазақтан шыққан әлем чемпионы Бахрейн, Жапония, Иран балуандарымен өзара мықтыны анықтайды.
Сонымен қатар, 74 келідегі Нұрқожа Қайпановтың жолына көпшілік үмітпен қарап отыр. 70 келіде әлем чемпионы атанған балуан беделді салмақта өзін мойындата ала ма? Олимпиададан сырт қалған Қайпанов үшін 74 келідегі жаңа асу – тап осы Азия біріншілігі болуы мүмкін. Одан бөлек, Нұрқожа әлем чемпионатындағы жеңісінен соң ресми жарысқа алғаш рет қатысқалы отыр.
Әйелдер күресі: Бақбергенова де, Сыздықова да бар
Азия чемпионаты десе, қазақстандық жанкүйерлердің есіне бірден Жамиля Бақбергенова түседі. Ол қазір әйелдер күресіндегі еліміздің басты жұлдызы саналады. 72 келіде белдесетін Бақбергенова Азияның бірнеше дүркін чемпионы, әлем чемпионатының жүлдегері және Қазақстанның басты үміттерінің бірі. Жанкүйерлер Жамилядан сенсация күтеді. Ол бозкілемде өз шеберлігін дәлелдеп, Қазақстан күресінің тарихына тағы бір алтын әріппен жазылуы мүмкін. Азия чемпионатында оның белдесулерін жіберіп алмаңыз!
«Классиктер»: Команда бар, бас бапкер жоқ
Грек-рим күресінен Қазақстан ұлттық құрамасы бұл Азия біріншілігіне бас бапкерсіз қатысуда. Париж Олимпиадасынан кейін Юрий Мельниченко өз еркімен қызметінен кеткен болатын. Қазіргі уақытта бұл лауазым бос тұрғандықтан, құраманы жарысқа аға жаттықтырушы Нұрым Дүйсенов бастап барды.
Бұл жағдай стратегиялық шешім қабылдауда және спортшылардың психологиялық дайындығына әсер етуі мүмкін. Дегенмен, тәжірибелі маманның біліктілігі командаға көмектеседі деп сенеміз.
«Классиктер» арасынан 2021 жылғы Азия чемпионы Сұлтан Әсетұлы, әлем чемпионатының, Азия ойындарының жүлдегері Мейіржан Шермаханбет, Париж Олимпиадасының қатысушысы, Азия чемпионы Әлімхан Сыздықовтарға сенім артамыз.
Азия біріншілігін қайдан тамашалай аламыз?
Азия чемпионаты 25-30 наурыз аралығында Иорданияның Амман қаласында өтеді. Жанкүйерлер бұл айтулы бәсекені United World Wrestling (UWW) YouTube арнасынан, Sport+ телеарнасынан және sportplustv.kz сайтынан тікелей эфирде тамашалай алады
Автор: Ынтызар Ынтымаққызы