Иордания астанасы Амманда өтіп жатқан күрестен Азия чемпионатында қазақстандық «классик» Әлімхан Сыздықов күміс жүлде иеленді, деп жазады Sportbugin.kz.
Грек-рим күресінен 130 келі салмақта белдескен Әлімхан Сыздықов финалға дейін Ирак және Өзбекстан балуандарын оңай жеңген болатын.
Өкінішке қарай, ақтық сында 21 жастағы ирандық балуан Фардин Шабан Хедаятиден ірі есеппен жеңілді. Талантты ирандық Сыздықовқа бір ұпай да бермей, 7:0 есебімен жеңіске жетті.
Бір қызығы, Фардин Шабан осы турнир барысында қарсыластарына бір ұпай да берген жоқ.
Осылайша, Азия чемпионатының алғашқы жарыс күнін қазақстандықтар 1 күміс, 2 қола медальмен аяқтап отыр.
Бұған дейін Ибрагим Магомадов (77 келі) пен Шамиль Ожаев (87 келі) қола медаль иеленген болатын.