Иордания астанасы Амманда күрес түрлерінен Азия біріншілігі жалғасуда. Өкінішке қарай, бүгін кілемге шыққан балуандарымыздың басым бөлігі бірінше белдесуде жеңілді, деп жазады Sportbugin.kz.
60 келіде белдескен Бақытжан Қабдыл алғашқы айналымна жапондық Каито Инабадан 0:9 есебімен жеңілді. Оның қарсыласы келесі кезеңде Солтүстік Корея өкіліне жол берді. Демек, Бақытжан үшін Азия чемпионаты аяқталды.
67 келідегі Мейіржан Шермаханбет те келесі кезеңге өткен жоқ. Ол Оңтүстік Корея өкіліне 5:11 есебімен жол берді. Кореялық спортшыны келесі айналымда өзбек балуаны оңай тоқтатты. Мейіржан үшін де биылғы чемпионат мерзімінен бұрын тәмам.
77 келіде сынға түскен Әділхан Сатаев қырғыз балуанынан 7:11 есебімен жеңілді. Оның қарсыласы да финалға өте алған жоқ.
97 келідегі Ильяс Гучигов үндістандық Нитеш Нитештен 0:9 есебімен ұтылды. Ол жұбаныш белдесуіне қатысу үшін қарсыласының финалға шығуын күтуде.
Ал 82 келідегі Омар Сатаев қана финалда белдеседі.
Өкінішке қарай, грек-рим күресі шеберлерінің жағдайы көз қуантарлықтай емес. Азияның алтынынан бұрын, бірінші айналымнан өту де мұң боп тұр. Бас бапкері жоқ командадан басқа нәтиже күту де қиын.