23-27 наурызы аралығында Армения астанасы Ереванда еркін күрестен халықаралық турнир өтті. Аталған сында қазақстандық балуан Едіге Қасымбек топ жарды, деп хабарлайды Sportbugin.kz.
Турнирде 11 елден келген балуандар күш сынасты. Қазақстан сапынан сынға түскен он спортшының бесеуі жүлдегерлер қатарынан көрінді.
Атап айтар болсақ, 125 келі салмақта Едіге Қасымбек топ жарды. Финалда ол ирандық балуанды 11:2 есебімен жеңді. Балуанның жеке бапкері Жәнібек Дәулеталының айтуынша, Едіге айтарлықтай мықты қарсыластармен кездескен.
«Едіге техникалық тұрғыдан ғана емес, рухани тұрғыдан да мықты. Ол еңбек пен тәртіпті қатар алып келе жатыр. Қазір қазақтың жас балуандары жақсы көтеріліп келеді. Алдағы уақытта Едіге бастаған жас балуандар ұлттық құрама сапында да жарқырайды», — дейді спортшының жеке бапкері.
Айта кетелік, Едіге Қасымбек еркін күрестен кадеттер мен жасөспірімдер арасында Қазақстанның 5 дүркін чемпионы. Жастар арасында екі дүркін Азия чемпионы әрі әлем чемпионатының екі дүркін күміс жүлдегері.
Бүгінде ол Республикалық спорт колледжінің бірінші курс студенті.
Сондай-ақ, Еревандағы турнирде Нұрданат Айтанов алтынмен көзге түсті. Сондай-ақ, 97 келіде Камил Куруглиев финалда ирандық спортшыға есее жіберді.