Волейболдан Өзбекстан ерлер құрамасы Жапонияда өткен Азия ойындарында күтпеген жағдайға тап болды, деп жазады Sportbugin.kz.
Ойын алдында волейболшылардың шұлықтары да командалық экипировкаға қойылатын бірыңғай талапқа сай болуы керектігі белгілі болған. Алайда өзбекстандық спортшыларда талапқа сәйкес бірдей шұлық болмаған.
Осыдан кейін команда ойын алдында жақын маңдағы тәулік бойы жұмыс істейтін FamilyMart дүкеніне барып, қажетті шұлықтарды сатып алған. Оның бағасы 429 иенді, яғни шамамен 3 долларды құраған.
Қызығы, шұлықтағы көк, жасыл және ақ жолақтар Өзбекстан туының түстеріне ұқсас болған. Волейболшы Шахзод Омонов жапондық БАҚ-қа берген сұхбатында дәл осы ерекшелікке көңіл аударған.
Осылайша, өзбекстандық волейболшылар Азия ойындарында жапондық дүкеннен алынған шұлықпен алаңға шықты. Оқиға жапон жанкүйерлері мен жергілікті БАҚ арасында қызу талқыланып, Азиаданың есте қаларлық сәттерінің біріне айналды.
About the Author
