Пара дзюдодан Астанада өтіп жатқан әлем біріншілігінде ақтөбелік Аяла Мереке Қазақстан қоржынына күміс медаль салды. Бұл бір жарым жыл бұрын пара дзюдоға ауысқан спортшының алғашқы жеңістерінің бірі. Жарыстан соң Sportbugin.kz тілшісі Аяламен тілдесіп, шағын сұхбат құрған болатын.
Аяла бұған дейін дзюдодан Қазақстан ересектер құрамасының сапында өнер көрсетті. Ауыр жарақаттан соң пара дзюдоға ауысып, өз мансабындағы ірі нәтижені тіркеп отыр.
«Спортқа алтыншы сыныпта, Ақтөбе қаласында аяқ бастым. Дзюдодан бөлек, самбо мен қазақ күресін де меңгергенмін. Жастар мен жасөспірімдер арасында елішілік және халықаралық жарыстарда жүлде алып жүрдім. Дзюдодан Қазақстан біріншіліктерінде үздік үштікке ендім. Біршама уақыт бұрын халықаралық оқу-жаттығу жиынында басымнан соққы алдым. Бұл менің көз тамырларыма да әсер етіп, көруім нашарлады. Содан соң, дереу пара дзюдоға ауысып, осы жақта үздік нәтиже көрсетемін деген мақсат қойдым», — дейді Аяла.
Ақтөбелік спортшы 2024 жылғы Париж Паралимпиадасында қола медальға күресіп, жеңіліп қалған. Астанадағы медаль бұл өкініштің орнын толтырды.
«Паралимпиада жүлдесі қолымнан сусып кеткенде қатты қынжылып едім. Сол есем осы жарыста қайтып, күміс медаль алдым. Ақтық сындағы қарсыласым өте тәжірибелі екен. Десе де, оны да жеңуге болады. Бұл турнир маған ерекше күш-қуат сыйлады. Ата-анамның қолдауынан күш алдым десем, артық емес. Оның үстіне, мен татамиге шыққан күні анам да жаңа жасын тойлап жатқан. Анамның туған күніне үлкен сый жасадым. Осы турнирге дайындалуға көмектескен Ақтөбе облыстық пара спорт клубына ерекше алғысымды айтамын. Мұнымен тоқтап қалмай, жаңа белестерді бағындырамыз», — деді Аяла.
Айта кетелік, Аяла Мереке J2 санаты бойынша 70 келі салмақта белдескен болатын.