Танымал спорт шолушысы әрі комментатор Есей Жеңісұлы бокстан әлем чемпионы Төрехан Сабырханның Азия біріншілігіндегі жеңілісін талдады, деп жазады Sportbugin.kz.
«Финалды көріп шықтым. Төреханның да, оның қарсыласының да еңбегін жоққа шығаруға болмайды. Менің ойымша, бұл – дер кезіндегі жеңіліс. Біз біреуді асқақтатсақ, төбемізге көтеріп жібереміз. Ал төмендетсек, жерге кіргіземіз. Мақтаулардың бәрі Төреханға кері әсер етпей тұрғанда, бұл жеңіліс дұрыс болды деп білемін.
Біріншіден, біз қарсыластардың өсіп келе жатқанын ұмытпауымыз керек. Кейінгі кездері дәл осы Иорданиядан жақсы боксшылар бой көтеріп жатыр. Токио Олимпиадасынан бері осы елден 67 келіден жоғары салмақтарда тегеурінді спортшылар шығуда. Париж Олимпиадасында біздің Асланбек Шымбергеновтің жолын қиған тап осы Зияд Ишаиш екенін ұмытпайық. Зияд — соққысы өте ауыр әрі дәл, сондай-ақ, агрессиясы мен физикалық дайындығы өте мықты боксшы. Олардың бапкері де ақымақ емес. Төреханның ашылатын, ойнайтын сәттерін әбден зерттеп алыпты. Яғни, қарсыластар тактиканы өте дұрыс қойған. Сондықтан, қарсыластың да, жалпы құрлықтағы басқа елдердің де деңгейін мойындау керек.
Мұндай қарсыластардың болғаны Сабырханның өзіне де жақсы. «Мына жерде тым артық кетіппін, мына жерде жеткіліксіз болыппын» — деп, іштей анализ жасасын.
Екіншіден, Олимпиадаға дайындықты өте жақсы пысықтау керек. Дәл осы жерден тоқтап, қай жерден қандай қате кеткенін бүкіл бапкерлер қауымының зерттегені жөн. «Ойнап жүріп ұтамын», «Кәсіпқой бокстың стилімен ұтамын», «Маған ешкім шақ келмейді» деген ойдан арылту үшін де бұл жеңіліс қажет. Бұл бізді жерге тығатын емес, біздің талантты боксшыларымызға да жақсы қарсыластар табылатынын ескерткен жекпе-жек болды.
«Алдымызда даңғыл жол жатыр, барамын да, Олимпиаданың алтынын ұта саламын» деген ойлардан арылту үшін де осындай жеңілістер керек. Өз басым күмісті олқысынбаймын. Ең бастысы, қазақ жанкүйерлері «Төрехан барған жерінің бәрін қидай сыпырып ұтады», — деген ойдан аулақ болуы тиіс», — деді Есей Жеңісұлы.
Еске сала кетейік, Ұланбатырда аяқталған бокстан Азия чемпионатында Төрехан Сабырхан күміс жүлдегер атанды.
About the Author
