Грек-рим күресінен Қазақстан командасының бас бапкері Қонысбек Төкенов Азия чемпионатында болған жағдайға қатысты пікір білдірді, деп жазады Sportbugin.kz.
Бішкекте (Қырғызстан) өткен Азия біріншілігінде қазақ балуаны Қаһарман Қисметов лас күрескені үшін айыпталған болатын.
77 келіде сынға түскен Қисметов қола медаль үшін өткен белдесуде өзбек балуаны Дониерхан Набиевпен кездесіп, қарсыласын жиі жарақаттады. Төрешілер өзбек балуанының жарақатына байланысты белдесуді бірнеше рет тоқтатып, соңында Набиевті мерзімінен бұрын жеңімпаз деп таныды.
«Аталған кездесуде менің өзім ұялдым. Біздің балуанымыз күреске жат әдістер қолданды.
Күрестің өзіндік ережесі бар, сондықтан, спорттық әдептен аспау керек. Жарыс біткен соң, Қаһарман өзбек балуаны мен бапкерінің алдынан өтіп, кешірім сұрады. Бұл — дұрыс қадам. Кілемде қызбалыққа салынғанын мойындады.
Қисметов биылғы Қазақстан біріншілігінің күміс жүлдегері. Отыз жастағы балуанды қатардан шығаруға болмайды, қазақ жігіттерінің сүйек майы кеш толады. Әйгілі Жақсылық Үшкемпіров ағамыз да Олимп шыңын 29 жасында бағындырды ғой. Қаһарманның салмағында Демеу Жадыраев, Мерей Мәулетхановтар бар.
Бұл екі балуан Қазақстан кубогына дайындалып жатыр», — деді бас бапкер.
Бішкектегі Азия чемпионатын Қисметов бесінші орынмен аяқтады. Ол іріктеу кезеңінде қырғыз балуаны Ақжол Махмұдовқа жол берген еді.
About the Author
