Қазақстандық таеквондошылар Kazakhstan Open турнирінің алғашқы күнінде он үш медаль жеңіп алды, деп жазады Sportbugin.kz.
Астана қаласында басталған таеквондодан халықаралық Kazakhstan Open G-1 рейтингтік турнирінің алғашқы жарыс күнінде Қазақстан құрамасы он үш медаль олжалады. Оның үшеуі алтын.
Ересектер арасындағы бәсекеде чемпион атанғандар: Самирхон Абабакиров (-68 кг), Батырхан Төлеуғали (-87 кг) және Бейбарыс Қабылан (+87 кг).
Финалда Самирхон Абабакиров Тунистің өкілі Фарес Боужеманы сенімді түрде жеңіп, алтын жүлдені иеленді. Ал Батырхан Төлеуғали Париж Олимпиадасының чемпионы, Фирас Катуссиден басым түсті. Аса ауыр салмақта сынға түскен Бейбарыс Қабылан биылғы Азия чемпионатының күміс жүлдегері, өзбекстандық Марат Мавлоновты тағы да жеңіп, жарыс жеңімпазы атанды.
Жарыстың алғашқы күнінде Қазақстан құрамасы жалпы саны 3 алтын, 3 күміс және 7 қола медаль жеңіп алып, командалық есепте екінші орынға тұрақтады.
Айта кетейік, Kazakhstan Open G-1 санатындағы жарыста спортшылар Лос-Анджелес Олимпиадасына қажетті рейтингтік ұпайлар үшін бақ сынауда.
About the Author
