Қазақстан кәсіпқой бокс федерациясы ұйымның басты ұстанымы боксшылардың мүддесі мен қауіпсіздігін қорғау екенін мәлімдеді, деп жазады Sportbugin.kz.
“Қазақстан кәсіпқой Бокс Федерациясының басты міндеті — боксшыларды қорғау, олардың мансабын өзгенің мүддесіне сай айла-шарғы жасауға жол бермеу. Біз өз спортшыларымызды әдейі жеңіліске ұшырататын жекпе-жектерге жіберіп, оларды біреудің пайдасы мен қаржысы үшін құрбан етуге ешқашан жол бермейміз.
Жалған белбеулерді саудалау мен рингті күмәнді титулдардың нарығына айналдыру дәуірі түбегейлі аяқталды. Жекпе-жектерді санкциялаудан бас тарту немесе лицензияларды кері қайтарып алу — бұл жеке көзқарас емес, спортшылардың қауіпсіздігін қамтамасыз ету және халықаралық регламенттердің сақталуын қатаң бақылау.
Спортшылар — құрбандыққа шалынатын материал емес. Әділ спорттың ережелері баршаға бірдей!” — деп жазды.
Айта кетейік, бұған дейін белгілі промоутер Жанпейіс Назарғали Қазақстан кәсіпқой бокс федерациясының жұмысына қатысты пікір білдіріп, отандық кәсіпқой бокста әділетсіздік, аяқтан шалу және көреалмаушылық бар екенін жазған болатын.
About the Author
