Жақсылық Үшкемпіров. Фото: olympic.kz
Астанада грек-рим күресінен 20 жасқа дейінгі балуандар арасында КСРО-ның еңбек сіңірген спорт шебері, Олимпиада және әлем чемпионы, Қазақстанның Еңбек Ері Жақсылық Үшкемпіровті еске алуға арналған халықаралық турнир өтіп жатыр.
Аталған додада Қазақстан, Бельгия, Әзірбайжан, Хорватия, Қырғызстан, Өзбекстан, Сауд Арабиясы, Ресей, Украина және Тәжікстан спортшылары 10 салмақ дәрежесі бойынша бақ сынауда.
Байрақты бәсеке 13 наурызда өз мәресіне жетпек.
Астана қаласында төртінші рет өтіп жатқан халықаралық турнирді Туризм және спорт министрлігінің Спорт және дене шынықтыру істері комитеті, Грек-рим, еркін және әйелдер күресі федерациясы мен қалалық спорт басқармасы ұйымдастырып отыр.