«Семей» футзал клубы жетекші спорттық құрал-жабдықтарды өндіруші Joma компаниясымен ынтымақтастықтың басталғанын мақтанышпен хабарлайды. Серіктестік аясында Joma 2024/25 маусымында команданың негізгі құрамы мен академиясының ресми формасы мен жабдықтарымен қамтамасыз ететін болады.
Спорттық киімдерді шығаруға жоғары сапалы және жаңашыл көзқарасымен танымал Joma семейлік клубтың ойыншылары мен жаттықтырушылар құрамын алаңда жоғары нәтижелерге қол жеткізу үшін қажет нәрсенің барлығымен қамтамасыз етеді. Бұған сапа мен жайлылықтың ең жоғары стандарттарына сәйкес келетін жаттығу жиынтықтары, ойын жиынтықтары, спорттық аяқ киімдер мен аксессуарлар кіреді. Joma сонымен қатар «Қайрат» футбол клубының ресми серіктесі болып табылады және спортшыларды жаттығу мен ойын киімдерімен қамтамасыз етеді.
«Joma-мен ынтымақтасу – біздің клуб үшін алға жасалған маңызды қадам», — деді «Семей» футзал клубының бақылау кеңесінің мүшесі Азамат Аселкан. «Joma өзін спорттық жабдықтар нарығында көшбасшылардың бірі ретінде көрсетті және біз клубымыздың осындай жоғары сапалы өнімдермен жабдықталатынына мақтан тұтамыз. Joma компаниясымен серіктестік «Семей» клубының имиджін нығайтуға септігін тигізетініне сенімдімін. Біз клубымыздың жыл сайын нығайып, танымал болуын қамтамасыз етуге тырысамыз және Joma сияқты танымал брендпен ынтымақтастық бұл процеске өз үлесін қосатыны сөзсіз».
Орталық Азиядағы Joma бренд-менеджері Артем Лоскутников та бұл серіктестіктің маңыздылығын атап өтті:
«Біз тамаша «Семей» футзал клубымен ынтымақтастықтың басталғанын хабарлауға қуаныштымыз. Біз команданың спорттық жетістіктеріне қуанамыз және олардың алдағы маусымда одан да арта түсетініне сенімдіміз. Joma бренді клубтың әр кезеңде қолдау көрсететін сенімді серіктесіне айналады. Сонымен қатар біз клубтың коммерциялық жағына белсене атсалысып, ортақ мақсатқа жету жолында бірлесе жұмыс істейтін боламыз. Біз бірге клубтың жарқын болашағына сенеміз және жаңа жеңістер мен табыстарға ұмтылатын боламыз».
Joma — 1965 жылы негізі қаланған спорттық киімдер мен аяқ киімдер шығаратын испандық компания. Компания өзінің инновациялары мен сапалы өнімдерімен танымал, бүкіл әлем бойынша командалар мен спортшыларды жабдықтармен қамтамасыз етеді.
Бүгінгі таңда компания «Вильярреал» (Испания), «Хетафе» (Испания), «Аталанта» (Италия), «Торино» (Италия), «Хоффенхайм» (Германия), «Норвич Сити» (Англия), «Андерлехт» (Бельгия), «Қайрат» (Қазақстан) және т.б клубтармен, ал ұлттық аренада Испания футзал құрамасымен жұмыс істейді.
Айта кетейік, 2023/24 маусымында «Семей» футзал клубы 20 жылдан астам созылған алматылық «Қайраттың» гегемониясын үзіп, клуб құрылғаннан кейінгі бірінші жылы Қазақстан чемпионы атағын жеңіп алған болатын. Келесі маусымда семейлік клуб УЕФА Чемпиондар Лигасына қатысып, португалиялық «Спортинг», венгриялық «Халадаш» және алматылық «Қайрат» командаларымен бір топта өнер көрсетеді.