IBF және WBO тұжырымдары бойынша ортақ салмақтағы әлем чемпионы Жәнібек Әлімханұлы өз атағын қорғау үшін кездесу өткізеді. Бокс кеші Қазақстанда ұйымдастырылады, деп жазады Sportbugin.kz.
Әлімханұлы түбі конголық француз боксшысы Анауэль Нгамиссенгке қарсы жұдырықтасады. Жәнібек 2017 жылдан бері тұңғыш рет Қазақстанда бокс кешін өткізгелі отыр.
«Құрметті жанкүйерлер, бұйыртса 5 сәуір Астана қаласында жұдырықтасамыз!
Өз елімде, сіздердің алдарыңызда өнер көрсетуді мақсат етіп жүр едім, оған да жеттік! Бұйыртса 2 әлем чемпионы титулын қорғаймыз!
Qazaq Style-ды ринг қасында, аренада отырып тамашалайсыздар! Жеңісті күнде жүздесейік!», — деп жазды спортшы желідегі парақшасында.
Әлімханұлы соңғы кездесуін 2024 жылдың қазанында Австралияда өткізіп, қарсыласын тоғызыншы раундта техникалық нокаутпен жеңді.