Бокстан әлем чемпионатының күміс жүлдегері Алуа Балқыбек Алматыдағы пәтерінің ипотекасын қалай жапқанын айтты. Бұл туралы ол Aqyrys Seitqazy YouTube арнасында мәлімдеді, деп жазады Sportbugin.kz.
Боксшы анасы дүниеден өткенге дейін Таразда тұрған екен. Біраз уақыт Алматыға барып, анасын емдеткен.
– Қазір Алматы қаласында тұрып жатырмыз. Анам ауырғанында Алматыға келіп, барынша емдеуге тырыстық. Өкінішке қарай, 2021 жылы анамыздан айырылып қалдық. Осылдан кейін Тараздан көшеміз деп шештік. Сол кезде пәтерді ипотекеға алуға тура келді. Өйткені, Тараз бен Алматыдағы пәтер бағасының айырмашылығы жер мен көктей. Сондықтан пәтерді амалсыз ипотекаға алдық. 2022 жылы әлем чемпионатынан екінші орын алған кездегі сыйақымды алып, сол ипотекамды жапқан едім. Қазір сол пәтерде әкем, әпкем және жиенім төртеуміз тұрамыз, – дейді Алуа Балқыбек.
Оның айтуынша, алып жатқан айлығын өз денсаулығына, дәрумендерге жұмсайды.
– 2022 жылы мемлекет тарапынан да, бұрынғы федерация президенті Кеңес Рақышев қолдау көрсеткен. Шахмұрат ағамыз қазір де біздің боксшыларға жақсы қолдап жатыр. Біздің ем-домымыз бар, оңалуымыз бар, олар қамтамассыз етілген. Десе де, қосымша дәрумендерді өз айлығымыздан аламыз. Ешқандай жұмыс оңай емес. Алған сыйақымызды оған дейін жұмсалған шығындарды жабамыз деп есептейміз, – дейді ол.