Ауыр атлетикадан 2014 жылғы әлем чемпионы Жасұлан Қыдырбаев өмірден өткен командаластары Владимир Седов пен Альберт Линдер туралы естеліктерін бөлісті. Бұл туралы ол журналист Ақырыс Сейтқазының Youtube арнасына берген сұхбатында айтқан, деп жазады Sportbugin.kz.
«Екі атлет те тамаша жандар болатын. Владимирмен үнемі бір бөлмеде тұрдым, өте білімді жігіт еді. Оны профессор деп атайтынмын. Өйткені, мен гуглдан қарап отырған ақпараттарды ол жатқа айтатын. Пәлен жыл бұрын кімнің чемпион болып, кімнің күміс медаль алғанын да жаңылыспай айтып береді.
Ал Альберт болса, артымыздан ерген ініміз еді. Ол да өте ақкөңіл жігіт болды. Альберт туралы айтқанда, оның тізесі ауыратыны еске түседі. Түнде тізесі ауырып, айғайлағанда көрші бөлмеде жатқан біз ұйқымыздан оянып, қасына баратын едік. Біз барсақ, тізесін құшақтап отырады.
Өкінішке қарай, екеуі де өмірден озды. Олар туралы тек жақсы нәрселер қалды есімде. Бірақ дәл бұлай істегендерін қолдамаймын. Ақыретте жауабы қиын болады», — деді Жасұлан.
Айта кетелік, қазақстандық ауыр атлеттер Альберт Линдер мен Владимир Седов 2021 және 2023 жылдары өздеріне қол жұмсап, қайтыс болды.