74kg FS - Nurkozha Kaipanov (KAZ)
Күрес түрлерінен Азия чемпионатында жеңімпаз және жүлдегер атанған спортшыларға сыйақы беріле ме? Sportbugin.kz тілшісі осы сұраққа жауап іздеп көрді.
Қазақстан бокс федерациясында жақсы дәстүр бар. Федерация басшылығы әлем, Азия чемпионаты сынды ірі жарыстан жүлдемен оралған спортшыларды бірден марапаттайды. Тек ересектер құрамасы ғана емес, жастар мен жасөспірім боксшыларға да жақсы нәтижелері үшін сыйақы қарастырылған.
Осы орайда, балуандардың жағдайы қалай?
Қазақстан күрес түрлері федерациясының вице-президенті Дәурен Еркінұлының айтуынша, балуандарға сыйақы қарастырылған. Тек бұл сыйақы жарыс біткен бойда емес, жыл соңында беріледі.
«Азия, әлем чемпионаттарынан жүлде алған балуандар сыйақысыз қалмайды. Азия біріншілігінің аяқталғаны кеше ғана. Спортшыларға сыйақыны жыл соңында өтетін федерацияның қорытынды кешінде үлестіреміз. Бұл үрдіс бізде дәстүрге айналды. Жыл сайын отандық күрестің дамуына үлес қосып, Қазақстан атын әлемдік жарыстарда шығарған балуандарға қаржылай сыйақы береміз», — дейді вице-президент.
Айта кетелік, Иорданияның Амман қаласында өткен Азия чемпионатында еркін және әйелдер күресінен Нұрқожа Қайпанов пен Жәмиля Бақбергенова жеңімпаз атанды.
Одан бөлек, бірнеше балуан күміс және қола жүлдегер атанған.
About the Author
