Әйелдер күресінен Қазақстан командасының бас бапкері Қайрат Сағадиев балуан қыздардың шашына қатысты ескертуін жеткізді, деп жазады Sportbugin.kz.
«Байқасаңыздар, Жапония, Үндістан, Солтүстік Кореяның балуан қыздары шашын қысқартып тастайды. Себебі, күрес кезінде ұзын шаш та кедергі болады. Тіпті, кореялық бапкерлер балуан қыздардың шашын өсіруге рұқсат бермейді деп естідім.
Біздің қыздардың шашы ұзын. Әрине, мен жақсы түсінемін. Қыз баласы болған соң, шаштың ұзын болғаны дұрыс. Көрік береді.
Бірақ қыздардың шашы белдесу кезінде айтарлықтай кедергі келтіреді. Алдымен, олар жекпе-жек қарсаңында шаштарын өреді. Бұл да кәдімгідей уақыт алады. Мен де қыздырыну керектігін айтып, оларға ескерте беремін.
Одан бөлек, шашты да кез келген адам өре алмайды ғой. Бір балуан қызымыз шаш өруге отырады. Бір емес, бірнеше қыздың шашын өреді. Сол кезде жаттығу да басталып кетеді.
Сондай-ақ, белдесу кезінде қыздар шашын түзеймін деп, әдіске түсіп қалады. Қанша дегенмен, күрес кезінде шашы босап немесе қозғалып кетеді. Ол да спортшыны алаңдатады. Қолын шашына апара берген кезде, қарсыласқа ұпай беріп қояды. Олар шашын түзеп алғанын күтіп тұрмайды ғой», — дейді Сағадиев.