Орал қаласында даңқты спотшы Асқар Шайхиевті еске алуға арналған дзюдодан ашық республикалық мәресіне жетті. Отандық федерацияның қолдауымен өткен жарыста алғаш рет спортшылар арасында автокөлік ойнатылып, жеңімпаздар анықталды. Турнирді ұйымдастырушы Рустам Шайхиевтің айтуынша, мұндай оқиға отандық дзюдо тарихында алғаш рет болып отыр, деп жазады Sportbugin.kz.
Дзюдодаа әлем кубогінің иегері, КСРО чемпионы Асқар Шайхиевті еске алуға арналған жарыс 2020 жылға дейін үзіліссіз, самбо спортынан өткізіліп келді. Кейін карантинге байланысты тоқтап қалған турнир енді жаңа бағытпен қайта жаңғыруда. Биыл тұңғыш рет дзюдодан Шайхиев атындағы ашық республикалық доданың жалауы желбіреді.
«Бұл бәсекені өткізу көптен бері ойда жүр еді. Жергілікті дзюдо жанашырларының бастамасын басшыларымыз құп көріп, Оралдағы жаңа спорт аренасында жоғары деңгейде ұйымдастырдық. Бұл турнир дзюдодан Қазақстанда өтетін негізгі үш жарыстың қатарына еніп отыр. Осы турнирде топ жарған балуандарға «Спорт шебері» атағын беруді де қарастырып, министрлікке өтінім жолдап қойдық. Дзюдошылар додасын өткізудегі басты мақсат – аталған спорт түрінің насихаатын арттырып, жастарды спортпен шұғылдануға үндеу. Сондай-ақ, дзюдо секілді беделді олимпиадалық спорт түрін Орал өңірінде қарқынды дамытуға ерекше назар аударып отырмыз», — дейді БҚО дзюдо федерациясының басшысы Рустам Шайхиев.
Дзюдошылар додасында 14 салмақ бойынша жеңімпаздар анықталды. Ал чемпиондар арасында ойнатылған су жаңа автокөлікті ақтөбелік Гүлнұр Бақанова ұтып алды. Әр чемпион өз есімдерін жазылған қағазды лототронға салған. Жеңімпазды Асқар Шайхиевтің немересі таңдады.
«Осы автокөлікті қыз балалардың бірі ұтып алса деген тілек болды. Залға жиналған жанкүйерлер де көліктің нәзік жандыларға бұйырғанын тіледі. Тілегіміз қабыл болып, темір тұлпар 70 келіде белдескен ақтөбелік қарындасымыз Гүлнұр Бақановаға бұйырды. Гүлнұр ауыр жарақат алып, бір жыл бойы емделген екен. Бір жыл татамиге шықпай, осы жарыста үлкен спортқа оралып отыр. Айтуынша, қиын кезеңдерде спорттан қол үзбеуіне ата-анасы себепкер болған. Олар қызының жарақатын емдеп, әрдайым демеу көрсетіп, жігерлендіріп отырыпты. Міне, осы көлік спортшының талай жылғы еңбегінің, бір жыл емделумен өткен уақыттың өтеуі секілді болды», — дейді Рустам мырза.
Турнирді ұйымдастырушылар облыстың тізгінін қолға алған жауапты тұлғаларға алғысын жеткізді.
«Бұрын жарыс өткізетін жер таппайтын едік. Қазір жанкүйерлер лық толатын су жаңа аренамыз бар. Облыс әкімі де, спорт басқармасының басшысы да қолымызды қақпай, қандай турнир өткізсек де, қолдап отыр. Аймақтарда біз сияқты спорт жанашырлары өте көп, тек соларды қолдайтын басшылар қажет екенін ұмытпайық», — дейді Рустам Шайхиев.
Болашақта Асқар Шайхиев атындағы дзюдо додасын құрлықтық жарыстардың күнтізбесіне қосу жоспарда бар. Биылғы турнирдің жүлде қоры 12 млн теңгені құрады.
Турнирдің құрметті қонақтары қатарында Батыс Қазақстан облысының әкімі Нариман Төреғалиев, дзюдодан әлем чемпионы Максим Раков, БҚО дене шынықтыру және спорт басқармасының басшысы Бақдәулет Сәбитов, Қазақстан дзюдо федерациясының атқарушы директоры Айбек Имашовтар болды.